إن كنت ناوي تعرف شو هي عملية "نبع السلام"، وشو اللي بصير في المنطقة، أعطيني من وقتك 10 دقايق، أنا تعمدت في هذا المقال إنه يكون باللهجة العامية، عشان فيه كتير من صحابي كانوا يدخلوا علي على الخاص، ويقولولي، إشرحلي اللي بصير يا محمد، أولا أنا مش خبير في الشأن التركي، وأي واحد بقلك إنه خبير في الشأن التركي، إسأله على طول:"حضرتك كيف إنت واللغة التركية؟" إن كان لا يتقنها، فسيبه فورًا، لكن الحمد لله، ربنا أعطاني نعمة "احتراف البحث، خاصة في الإعلام الأمريكي"، لهيك، بدي أهديكم هذا المقال، اللي بكرر وبقول إنه كنت متعمد إني أكتبه باللهجة العامية، عشان تفهم شو اللي صار، وصدقني بوعدك إنك تستمتع في القراءة، وكمان راح تستفيد، هذا المقال أخد مني عشرة أيام تقريبًا، أتمنى لك الاستفادة، خاصة للي ما كانوا فاهمين شو هي "نبع السلام"، وأنا واحد منكم:
1) أولا: مين هم الأكراد؟
الأكراد هم عرقية، منتشرة ما بين إيران، تركيا، العراق، سوريا، وأرمينيا، بلغ تعدادهم تقريبًا ما بين 25 لـ 40 مليون نسمة، في سوريا بلغ تعدادهم 1.7 مليون نسمة تقريبًا، متواجدين في شمال سوريا، أغلبهم من المسلمين السنة، وفيهم شيعة، ومسيحيين، طب ليش ما إلهم دولة؟ لأنه نصوص معاهدة سيفر، وحتى معاهدة سايكس بيكو، ما قسمولهم من الكيكة –لأنه اللي قسم كان شايفهم مواطنين مندمجين، الكردي العراقي، عراقي، والكردي السوري، سوري، والكردي التركي، هو تركي-، لكن في سوريا على سبيل المثال، كان حافظ الأسد حارمهم من حقوقهم الأساسية كالجنسية مثلًا، لكن في نفس الوقت، بدعم مطالبهم الإنفصالية برة سوريا، كورقة ابتزاز لخصومه -عبد الله أوجلان، مؤسس حزب العمال الكردستاني PKK- كان في سوريا حتى أواخر التسعينات، وكان ينفذ هجماته على تركيا من سوريا، جايين لقصتهم مع الأتراك، تستعجلش!
إنفصالهم عن الدول، مشكوك في أمره، لسبب واحد، هم بتحججوا إنه فيه عنصرية تجاههم، طيب العنصرية وين ما إجا، تخيل السود في أمريكا يقولوا بدنا دولة لحالنا، يا رجل حتى غزة، فيها عنصرية، وأنا آسف إنه أقول هالكلام، لكن العنصرية مرض متجذر في كل المجتمعات في العالم، مش بس على الأكراد، يعني إنت حاسس بعنصرية، تروح تقول بدي أعمل دولة لحالي؟ هان الخلل، بعدين تعال هان، شوف وضع الأكراد في العراق، ماخدين الشمال كله، بنفطه بمدنه بثرواته، تصدق إنه الرئيس العراقي، لازم، وبحسب اتفاق مش مدرج في الدستور العراقي، إنه منصب رئيس الجمهورية، ومن أول انتخابات بعد سقوط صدام حسين، لازم يكون كردي. إنت مش عاجبك وضعك في تركيا أو سوريا أو إيران، روح على شمال العراق، أما إنك تاخد جزء من العراق، وجزء من تركيا، وجزء من إيران، وجزء من سوريا، وتقول بدي أعمل دولة، فوقف عندك، هاي أجندة الكل متفق إنها مشبوهة، ويكفي دعم إسرائيل لهذا المطلب، مطلب تقسيم المقسوم، هذه تكفيني أنا على الأقل، إني ما أتعاطف مع أيٍ من الجماعات هدول، وبنقول وبنأكد، الأكراد إشي، والجماعات الانفصالية اللي بتدعي إنها بتمثلهم إشي تاني، وححكيلك لقدام كيف، وبالدليل، بس إصبر علي.
نرجع لموضوعنا..آه، وبعدين والأهم، ليش ما تتمتع بحقوق المواطنة بالقانون؟ مثلا في تركيا، عندك الأكراد، والأحزاب الكردية، إلهم ممثلين في مجلس الأمة التركي، وبعض نوابهم بطلع على المنصة وبهاجم الدولة، خاصة بعد العملية تاعت نبع السلام.
حيجي متفلسف ويقول، أيوااااااااا، يعني هم زيهم زي فلسطين؟، حقلك لأ طبعًا، لأنه فلسطين على الأقل، اتفاقية سايكس بيكو، المشؤومة اعترفت فيها، فلسطين هم السكان الأصليين، واليهود إجو من برة استوطنوا فيها، والقانون الدولي بعترف بفلسطين أرض تحت الاحتلال، الاحتلال إشي، والمطالب الإنفصالية اللي بنفذها من يدعي إنهم يمثلون الأكراد إشي تاني!
هلقيت، الPKK نفذت هجمات دموية على تركيا، من سنة 1984 بحجة، بدهم دولة لحالهم، طبعًا تركيا ما سكتت، واجتثت هاالمطالب بشكل قوي أيضًا، الصراع هادا كلف الجانبين حوالي 40 ألف قتيل.
2) ليش تركيا كتير مهتمة بالأكراد اللي في سوريا؟
بسبب علاقات الPYD، بتنظيم الPKK اللي ما بيقدر ينكرها أي حدا، الPYD، هو اختصار لـ "حزب الاتحاد الديموقراطي"، وتأسس سنة 2003 في سوريا، وإله جناحين عسكريات، واحد إسمه YPG ، "وحدات حماية الشعب"، وتاني إسمه YPJ، هو نفس الأول، لكن كل أعضاؤه من النساء، طبعًا خبرته العسكرية استفادها من الPKK.
الشاهد إنه مع اندلاع الثورة السورية، راح بشار في 2012، انسحب من كل الشمال السوري، وهذا خلق البيئة المثالية للتنظيمات هاي، اللي بكرر وبقول إنها بتدعي إنها بتمثل الأكراد، وإنهم يتحكموا في المنطقة، لا وسموها "روج آفا" اللي معناها "غرب كردستان"، مهو إنت مش عارف، كانوا مقسمينها كالتالي: غرب كردستان في سورية، شرق كردستان في إيران، شمال كردستان في تركيا، جنوب كردستان في العراق، شو يعني هادا؟
يعني يا كبير، إنه تركيا شايفة إنشاء كيان كردي على الحدود معها، تهديد وجودي، وخطر كبير، معناته بكرة كل الأكراد اللي في تركيا حيقولوا:"بدنا ننقسم لحالنا، وننضم للكيان الكردي الموجود في سوريا"، يعني الأرض التركية كل جنوبها يروح، وتتقسم البلد، وهذا كل عاقل يرفضه رفضًا قاطعًا، غير إنه بأثر على أيدولوجيات الأكراد الموجودين في البلدان التانية، لأنها راح تعمل لخبطة في انتماءاتهم، هو أنا مواطن تركي، قوميتي تركية، ولا كردي، منتمي للعرقية اللي عايشة على حدودي؟وهادا خط أحمر عند تركيا، بل عند أي بلد بتحترم حالها.
3) طب ليش الجماعات هاي، أمريكا حطت إيدها في إيديهم؟
عشان أجاوبك ع هالسؤال شغل في الخلفية: "قريبًا قريبًا، ترون العجيبا"، أو "صليل الصورام.." أيوا...برافو! الحجة "داعش"
هلقيت "داعش" يا مولانا، في 2014، صحينا من النوم، هوووووب، لهم صاروا دولة خلافة، ضل زحفهم يمتد من شمال العراق، لحتى شمال سوريا، يقتلوا ويلعنوا شرف كل واحد في طريقهم،
ركز: "كل واحد في طريقهم"، من ضمنهم التنظيمات الكردية.
ورغم إنه داعش صارت على أبواب تركيا، في سبتمبر 2014، بعد ما قربوا يوصلوا لمدينة "كوباني-عين العرب" إلا إنه تركيا رفضت تتدخل، على قاعدة سياسية بسيطة جدًا يا صاحبي، إنت بتعرفها: "بما إنه عدوي قاعد بقاتل في عدو تاني بردو عدوي، فمن الأفضل إني أقعد وأجيب فشار وأتفرج عليهم بدبحوا بعض"، أمريكا قالت لتركيا، بدنا نقاتل داعش، تركيا قالت إلها:"طير إنت، بس قبل ما تطير، عندك خيار أفضل، خود الجيش السوري الحر، وإدعمه، خليه يقاتل داعش، وأنا بساعدك".
راحت أمريكا قالت:"أنا شايفة إنه المقاتلين الأكراد أشداء، أكثر من الجيش الحر وعشان هيك بدي أدعمهم" تركيا قالتلها: "دربي الجيش الحر، وبصيروا أحسن من الأكراد" أمريكا ردت:"لا"، وهاتلك حوار جيش حر، تنظيمات كردية، بين أمريكا وتركيا، وما خلصنا.
عاد هان إنت من حالك مفروض تعرف إنه أمريكا عمرها ما كانت مع الشعب السوري، اللي الجيش الحر، بمثل المعارضة المسلحة المعترف بها دوليًا، لكن إلها أهداف أخرى، أعوذ بالله، مش النفط في شمال سوريا مثلا، أي نفط ما نفط، وليش ندعم الجيش الوحيد اللي خرج من جيش بشار، وقادر لو تم تدريبه ودعمه، إنه يهزم قوات النظام، مع إنه وركز، الجيش الحر، فيه كتير في صفوفه أكراد، يعني تدرب جيش زي الجيش الحر يا أمريكا، فيه كل مكونات الشعب السوري اللي رافضة لبشار، ولا تدربي مليشيات إنفصالية، وبتعزز الخلافات بين المعارضة؟ لأنه هاي هي أمريكا، بارعة في تقسيم المقسم: شيعة سنة أكراد، عراق مين والناس نايمين، كردي عربي، جيش حر، داعش، سوريين مين، والناس نايمين، عرفت هلقيت يخو شو الفرق بين ما تدعم الجيش الحر، وقوات تانية، ما بدها أصلا تكون جوا سوريا كسوريين؟
بعدين بدك تدعميهم يا أمريكا؟ حتى لو إنتي معترفه في تنظيمهم الPYD، تنظيم إرهابي؟ إنت والاتحاد الأوروبي؟ من سنة 1997؟ أمريكا قالت آه، هادا كان في عهد أوباما، نسيت أقلك حاجة مهمة، إنه أمريكا بدها تحارب داعش، أي نعم، لكن دعمها للأكراد، كان لسبب قوي جدًا، بدهاش تنزل جيشها، مواطنين أمريكيين، في سوريا لمحاربة داعش. "نقطة سطر جديد".
وحاجة تانية نسيت أقولها: طب ليش ما أخدوا الجيش السوري الحر؟، رغم إنه حتى الCIA، دعمته من 2013؟ لسبب بسيط، لإنه هدف الجيش السوري الحر، هو النظام أولا وأخيرًا، داعش بدهم يحاربوهم أي نعم، لكن النظام أولوية عندهم، وعشان هيك ما دعمته أمريكا في حربها على داعش، بلاش يقوى، ويجتث النظام فعلاً، شفت مين مستفيد إنه الوضع في سوريا يضل على ما هو عليه دون أي حسم من أي طرف، خلاط سلطة وشغال، إحنا هيك مبسوطين عليه؟
4) هل التنظيمات الكردية هزمت داعش فعلاً؟
إدارة أوباما، أعطت تدريب ودعم جوي لتنظيم الـPYG، عشان يساعدوهم في محاربة داعش في شمال سوريا، كان أوباما، بده يستخدمهم، ركز، يستخدمهم، لهزيمة داعش، مع تدخل محدود جدا للقوات الأمريكية، ترامب في 2017، كان بده نفس الحاجة، لكن إنت عارف كيف ترامب، راح في مايو 2017، تغابى، وقرر مش يدرب ويعطيهم دعم جوي، لا، الحبيب قرر إنه يسلحهم، هيك خلى تركيا تولع!
ترامب يومها قال: إنه السبيل الوحيد لتحرير الرقة بالكامل، واجتثاث داعش هو تسليح التنظيمات هاي، وأنا بديش ولا جندي أمريكي ع الأرض"، المهم زبطت معه، وفعلا، في أكتوبر 2017، الرقة تم تنظيفها من داعش، في مارس هاي السنة 2019، آخر معقل من معاقل داعش، تم القضاء عليه، ويومها ترامب، طلع وقال، نظفنا سوريا تمامًا من داعش!
5) طب ليش عملية نبع السلام صارت؟
كمل شرب قهوة، أو إعملك فنجان تاني، لأنه لازم تركز في هالسؤال شوي، هلقيت يا معلم، بعد تطهير المنطقة من داعش، مين بطبيعة الحال بده يحكم؟ التنظيمات الكردية طبعا، كل هادا على عينك يا تركيا، بدوا يكبروا، ويتوسعوا، ويصيروا شبه دولة، بل قول دولة، ما هم صاروا دولة " روج آفا"، ولا نسيت؟ هان بدت تركيا، تقول، بس!، قرب الخطر علي كتير، اللي ما حققوه هدول من 1984، إجاهم على طبق جاهز من دهب، وأظن تعبت وأنا أقلك فوق، ليش دولة أو شبه دولة كردية على حدود تركيا الجنوبية أمر جلل، فالحل الوحيد، إنه تركيا تعمل منطقة عازلة على حدودها، خالية تمامًا من هذا الكابوس، تبع الدولة الكردية، وعملت تركيا هيك سنة 2018 في عفرين، لكن المنطقة العازلة ما كانت كافية، ولما يعمل أردوغان منطقة عازلة، بده يحقق هدف تاني، الصحيح كتير قالق الأتراك: وجود 3.6 مليون لاجئ سوري في البلد، وهادا مش سر، بل أردوغان في اجتماع الجمعية العمومية للأمم المتحدة، رفع خريطة، وقال بدي أعمل منطقة عازلة، تكون شبه حل للأزمة السورية، أزمة اللاجئين، اللي كتير من الأتراك بقولوا إنه أسباب كتيرة من تردي الاقتصاد التركي، البطالة مثلا، سببها تكدس اللاجئين، لكن اللي كان مانع تركيا من "توسيع المنطقة العازلة" هو وجود قوات أمريكية في المنطقة، في ديسمبر 2018، ترامب، قال إنه بده يسحب قواته من سوريا، ورغم إنه ترامب تراجع عن القرار، ووعد، وتراجع. إجا شهر أغسطس، راحت تركيا وأمريكا وقعت "اتفاقية مشتركة" فيها "مراعاة لقلق تركيا الأمني شمال سوريا"، ومن الاتفاقية، أمريكا وتركيا بدو يسيروا دوريات مشتركة في الشمال، شوي شوي، ترامب وافق إنه "يعيد تموضع" القوات الأمريكية في شمال سوريا، كل هادا وتركيا بمنتهى الصبر اللي خلص أصلا، قاعدة بتستنى الوقت المناسب إنها تدخل هي، وتشيل كل التنظيمات الكردية، فش أيام، وهيك بدت فعلًا عملية "نبع السلام".
6) شو كانت ردة فعل تنظيمات الـYPG، والـPKK؟
"أمريكا تطعننا في ظهورنا" هذا كان التصريحات الرسمية من التنظيمات هاي، بعد ما انسحبت أمريكا، ودخلت تركيا، حزر فزر شو عملوا هالتنظيمات، والله يمكن ما تصدق: "راحوا بدهم يتحالفوا مع قوات النظام السوري" تخيل؟ مع الأسد والله زمبقولك كده، إجاك كلامي إنه هدول مش معروف لشو موجودين أصلا، قبل إمبيرح كانوا عاملين حالهم مع الثورة السورية، وإنهم ضد الاضطهاد اللي بمارسه بشار، وهلقيت بحطوا إيديهم في إيديه، إجاك كلامي إنهم أصلا، ولا يمكن إني أتعاطف معهم، وإن كنت عن جد همك الشعب السوري، فليش ما حدا دعم الجيش السوري الحر، اللي كل أولويته إسقاط النظام المجرم الدموي، إن كان حدا فعلا قلبه على الشعب السوري اللي قاعد بندبح كل يوم بالبراميل، وبتجيك جامعة الدول العربية تستنكر "التدخل التركي في شمال سوريا" هلقيت صار النظام السوري حبيبهم بعد ما طردوه، حكم عقلك، وحتشوف كيف الصورة الكبيرة في سوريا، إنها معقدة، ومؤامرة، مؤامرة مش بمفردات النظام، بل مؤامرة على عدم نصرة الشعب السوري، والتدخل بحق وحقيقي لإنقاذه من البراميل المتفجرة، وتذكر إنه كيف أمريكا ما بدها إلا تساعد هالتنظيمات رغم إنها معترفة إنهم إرهاببين، عشان الشعب السوري، ولا عشان يضربوا مليون عصفور بحجر واحد: تضل هالمنطقة بفوضى: ببتز تركيا، بفكك الشعب السوري، برضي إسرائيل -تذكر إنه الوحيد في المنطقة اللي بدعم قيام دولة كردية هي إسرائيل- صحصح يابا، صحصح.
المهم تركيا في اعتقادي تعاملت أيضًا بذكاء بعد هالخطوة، ما هو مين البابا تبع بشار؟ برافو، روسيا، بوتين، وإن كان ولد صغير حيغلبك، كلم أبوه، منه بسكت بشار لو بده يتهابل هو وحلفاؤه الجداد، ومنه كمان ورقة ضغط على حليفي في الناتو: أمريكا.
7) طب هل هاي التنظيمات عندها ورقة قوة تبتز فيها العالم؟
صحيح، عندهم، مساجين وأسرى داعش وعائلاتهم، بل إنه في نص عملية "نبع السلام" فتحوا أكبر سجن في عين عيسى يحتوي على مساجين لداعش، راحت أمريكا قالت: على تركيا تحمل مسؤولية هؤلاء الأسرى، شفت أوسخ من هيك؟ راحت تركيا، قالت: أنا أصلا داخلة أطهر المنطقة من كل التنظيمات الإرهابية، جماعتكوا اللي بتبتزونا فيهم، وداعش يا سيدي، ولا يهمك.
8) السؤال الأخير والأكثر وجعًا:"طب كل هالميمعة شو بتعني للسوريين وسوريا"؟
آخ يا قلبي، والله آخ يا وجعي أنا، أولاً من المبكر جدا جدا إنا نحكم، شو بده يصير؟ هل فعلا راح يرجع السوريين في المنطقة العازلة اللي بدها تعملها تركيا؟ تذكر إنه في عملية غصن الزيتون ودرع الفرات، 360 ألف سوري لاجئ، رجع، وعايش في مناطق تركيا بنت فيها مدارس ومشافي، وبنى تحتية كاملة.
طب هل حيتكرر هادا السيناريو، وفيه قوات روسية؟ هل حيرجع لاجئين على المنطقة هاي، وقوات الأسد مع تنظيمات الPKK تحالفوا وصاروا حبايب؟ هل تركيا راح تحمي هالمنطقة واللي حيجوا فيها منهم؟ طب هل ممكن تصير هالمنطقة آمنة بالكامل باتفاق دولي، بحيث إنها تصير جنة لكل اللاجئين السوريين حتى اللي هرب منهم على أوروبا، لأنه الغربة دبحتهم، ونفسهم يعيشوا في بلدهم بأمان -لي كثير من الأصدقاء السوريين، وكلهم مش حابين الغربة-؟ وهل وهل؟ فيه ألف سؤال، وزي ما قلتلك، الإجابات عليها بدها وقت عشان نحكم
المصادر يا عيوني:
https://www.bbc.com/news/world-europe-20971100
https://foreignpolicy.com/2015/08/10/sykes-picot-treaty-of-sevres-modern-turkey-middle-east-borders-turkey/
https://www.rudaw.net/english/middleeast/syria/24062019
https://www.vox.com/2014/10/6/6918763/kobane-isis-where-is-kobane-turkey
https://www.bbc.com/news/world-middle-east-29390781
https://www.france24.com/en/20150730-who-are-kurds-turkey-syria-iraq-pkk-divided
https://www.reuters.com/article/us-mideast-crisis-usa-syria/trump-ends-cia-arms-support-for-anti-assad-syria-rebels-u-s-officials-idUSKBN1A42KC
https://www.nytimes.com/2017/05/09/us/politics/trump-kurds-syria-army.html
https://www.nytimes.com/2017/10/17/world/middleeast/isis-syria-raqqa.html
https://www.theguardian.com/world/2019/sep/24/erdogan-proposes-plan-for-refugee-safe-zone-in-syria
https://www.wsj.com/articles/turkey-aims-to-end-a-backlash-by-sending-syrian-refugees-home-11565343121
https://www.dw.com/en/turkey-us-work-to-create-buffer-zone-in-northern-syria/a-50013705
https://www.aljazeera.com/news/2019/10/kurdish-forces-decry-pullout-syria-191007145220366.html
https://www.aljazeera.com/news/2019/10/pullout-syria-kurds-costly-deal-assad-191015122222288.html
https://www.militarytimes.com/flashpoints/2019/10/07/how-the-us-troop-withdrawal-from-northern-syria-could-create-an-isis-resurgence/
أخوكم/
محمد حسام منصور
