الرأي السديد في مسلسل جن

[مسلسل جن!]

قرأت مئات التعليقات والانتقادات من محترفين في المجال ومن مشاهدين ومهتمين بعالم السينما والأفلام، معظم التركيز انصب حول المسبات والمشاهد المخلة بالآداب العامة سواء مع أو ضد. ححكي عدة نقاط:

🔵 شخصياً نفرت من المسلسل بسبب التلوث السمعي: مسبات ليس لها أي سبب ولا مكان ولا داعي ولا تخدم النص ولا الحوار مبعثرة في كل مكان لأجل جعل الحوار "ممتعاً وملفتاً أكثر"، وهذا بالنسبة لي يدل على ضعف في كتابة الحوارات، وهو ضعف ظاهر وواضح لأي مُشاهد تقريباً. ترجمة مباشرة من الانجليزية للعربية. مثال لمن لم يشاهد المسلسل:
احنا بنحكي "كان يا ما كان" لما بدنا نحكي قصة.. صح؟
بالمسلسل بيحكو "في زمن مش بعيد عن هاد الزمن"..
عمركم سمعتو حدا بدأ قصة بالعربي هيك؟
في زمن مش بعيد عن هاد الزمن!

🔵 أما موضوع تقبل المسبات في مسلسلات أجنبية ورفضها لمسلسل أردني، لا يعني انه المواطن العربي/الاردني "بوجهين" ولا انه "متناقض" ولا "بيسوق الشرف"، الموضوع بسيط: المسلسل الأمريكي بيمارس هاي الممارسات واقعيا في الشارع، ومقبولة في العرف والمجتمع. سواء حصلت في المولات أو المطارات أو حتى تقبيل زوجين على باب المدرسة بعد وصول أو مغادرة أحدهم كل ذلك مقبول. والتعري الكامل كذلك سواء على شواطئ خاصة، أو شواطئ عامة مفتوحة "يُنصح ولا يُمنع" تواجد المراهقين فيها.
ولكن تيجي لمواطن أردني، وتحكيله لازم تتقبل مشاهدة هاي المناظر من ناس هم جيرانك وأهلك، وبشوارع عمان، وبطريقة ظاهرة وبالبترا وفي الباصات، أمر مستهجن. ولازم تقبل انه هاي المشاهد تكون "أردنية" وما يكون عندك مشكلة، كذلك طلب غريب. الموضوع انه لما تحصل هاي الأمور بتحصل بالسر أو عالسكيت، أو في أماكن وحفلات مغلقة في عمان أو فعاليات خاصة أو من ورا الأهل. ولولا انها مرفوضة شعبيا ولولا أنها غير مقبولة عرفيا لما كانت "خاصة" ولا كانت "مغلقة" وكان بيصير عادي التقبيل براحتك قدام أهلك. فنعم، الطابع العام لهذه الممارسات مرفوض تماماً حتى لو كانت بتحصل بالخاص، بس انك تطلب انها تصير "مسموحة بالعام" أمر مختلف تماماً عن "معرفة وجودها في الخاص".

🔵 اشتغلت بأفضل مدارس الأردن، فكروا بمدرسة، اشتغلت بالأفضل منها وعلى مدار ٤ سنوات، دور المعلمة في المسلسل "كيف تعمل هيك من وراي؟" عن شرب الكحول.. مبتذل وغير منطقي لا بمسلسل عربي ولا أجنبي. في فصل، وفي إنذار، وفي منع، وفي أهل، وفي عقاب، وفي تدخل أمني ومحاكم في حال كان في حشيش ومخدرات. سخرية من الدولة وقوانينها والمدارس والتعليم والمعلمات انه بعد الكحول والحشيش ردة الفعل تكون بس "انت كيف تعمل هيك من وراي؟". وترجع الأمور لمجاريها. ولا كانه صار اشي.

🔵 في عائلات مسيحية أردنية بتمنع كل الكحول من منزلها. فحتى لو البعض حكى بيكونو مسيحيين يعملوا متل ما بدهم. مين في مسيحي بيسمح لابنه يشرب براحته بعمر ١٤؟ أو يدخن؟ أو مخدرات؟ وحتى المصاحبة للمراهقين مش شيل وحمّل، في مراقبة للأهل. كم أهل عندهم ابنهم يقبل بنت براحته أمامهم، عادي؟ يعني فعليا رقابة الأهل بالمسلسل على ولادهم كانت كإنهم بلا أهل..

🔵 وجود الشيء لا يعني تقبله: وكونه والدك بيسكر بالليل، لا يعني انت بتحب تشوفه بيسكر، ولا انك تعمل عنه فيلم انه بيسكر، لتصير friendly أكتر مع الوضع وتاخد عليه ولأنه واقع. مش كل اشي بيصير لازم نحطه بفيلم لنحكي "هاد واقع ولازم نتقبله": مش ضروري نصور الناس بتتحمم لنحكي هاد واقع، ولا عم تروح عالحمام لنحكي "كل العالم يبول فما المشكلة". في أمور، مش ضروري نعمل عنها فيلم. جد..

🔵 ظهرت مجموعة تدّعي: الفيلم العالمي لازم يكون فيه مشاهد إباحية وتعري، وانه مسلسل جن كان ولا اشي ولو بده يوصل لسا بده كمان مشاهد. وهاد بالدليل التالي كلام غلط بغلط، الفيلم الناجح قصة وتصوير وحوار وتمثيل ناجح، مش مشهد تقبيل ناجح. مثال على أفلام "تكاد" تخلو من أي مشاهد أو فعلاً خالية ١٠٠٪:
Life of Pi
Deception
Theeb
Léon
The Green Mile
The Pianist
Lord of the Rings
الأفلام الايرانية اللي كل سنة بتحصد أوسكارز

🔵 أهم نقطة بالنسبة الي هي التالي:

المجتمع الأردني، وغيره مجتمعات عربية أخرى تمثيلها ووجودها في إنتاجات عالمية ضعيف جدا، سواء كانت إنتاجهم أو إنتاج جهة أجنبية. وهاد بيخليها defensive لأي مشهد بيعبر عنها. بنحاول كعرب نظهر الخير الموجود بين الناس والعادات والتقاليد، بينما بيلجأ البعض للتركيز على الفئة الخربانة، وكأنه فئات المجتمع التانية واللي هي أكترية، غير موجودة! وهاد تماماً صار بمسلسل جن: التركيز على الجزء اللي خربان.
الممثلين كانوا فقط بيعبروا وبيمثلو رواد الحفلات الخاصة، والبارات المغلقة، والحشيش والمخدرات غير القانونية، والمراهقين اللي مش سائلين، والأهل اللي كمان ضعفاء وما بيعرفوا عن أولادهم أي شيء والمدارس اللي بدون نظام.. هاد مختصر مسلسل جن، ولو كانوا جزء من المجتمع ، هدول مش المجتمع!

في أمريكا، لو بيتم انتاج أي شيء عن الأمريكي الأصلي Native Americans بيتم دراسة كل كلمة بتنحكى، ليش؟ لأنهم أقلية ومظلومة وبالتالي أي غلط عنهم ممكن يأدي لحملات كبيرة تضطر شركة الإنتاج للاعتذار وأحياناً حذف الفيلم عشانها.
وكذلك العرب بيعتبرو نفسهم "مظلومين" إعلاميا، وهاد واقع، فعلاً مظلومين بالأخبار وتمثيلهم بمشاهد إرهابية أو خليجي مليونير بيبحث عن بنت يشتريها، وكذلك هم أقلية من بين الإنتاجات الإعلامية.
العربي والأمريكي الأصلي "كمثال" هم فئة مستضعفة وأقلية ومظلومة إعلاميا من قبل سلاطين وجبابرة الإعلام الغربي. فلا تستغرب، لما يزعلوا من انه تم تصوير الجزء السيء من مجتمعهم فقط.

رد الفعل والاستياء من المسلسل والاستنكار أمر مش مفاجئ، من أردني كان بينتظر على نار المسلسل، ونشر عنه بكل فخر من شهور طويلة انه وأخيراً، أول مسلسل عربي هو أردني، بيتفاجأ انه المسلسل اختار اسوأ فئة بالمجتمع "كحول ومخدرات ومشاهد غير ملائمة" وكلها مع فئة المراهقين، وهي أخطر فئة ممكن توجه المسلسل لإلها. بعضكم حيقول هاي خيالية ولا تعبر عن الأردن: لو فعلاً ما كان ما تم التصوير بواحد من أشهر المعالم بالعالم وما في منه أي مثيل (البتراء)! يعني المسلسل كله: أردن، أردن، أردن! وحتى اللهجة، مع انها معووجة.

ببساطة، ليش الناس زعلانة؟ لأنه المسلسل خذلهم..وأحبطهم بعد ما رفعوا آمالهم.

---
🔵 بكل الأحوال، المسلسل self-destructive، يعني:
١- من المسلسلات اللي بتنشاف مرة وحدة.
٢- ما في أي اقتباس أو موقف ممكن تطلع منه بدرس تتذكره بعد ما تخلص المسلسل not memorable.
٣- نادراً ما تلاقي حد حينصح آخرين بمشاهدته، لانه ببساطة.. ضعيف من كل الجهات إلا التصوير صراحة، أكثر من رائع! not-recommendable

فالمسلسل حيموت، بس رغبة الناس انها تشوف اشي عالمي باسمها وبيرفع الراس.. حتضل موجودة.. متل ما كان فيلم ذيب، حيكون في غيره

#جن #مسلسل_جن #Jinnseries #Jinn

بقلم محمد الكويفي

اعلامي ومدون من غزة -فلسطين- ماجستير ادارة إعلام، بكالوريوس صحافة واعلام، دبلوم تكنلوجيا معلومات، دبلوم لغة انجليزية في الصحافة والسياسة، مدرب اعلام وانتاج ....

Posted in: