طريقة عمل الكنتاكي في البيت مع الثومية

طريقة عمل الكنتاكي في البيت مع الثومية

الموضوع كاملا منقول من منتدى فتكات

بسم الله نبدأ

الأول هنجيب فرخه كبيره ونقطعها ل 8 قطع .. ونشييل الجلد
وبعدين بالسكينه نعمل فتحات فيها تصل للعظم زي ما في الصوره

في كوباية الخلاط نحط مكونات التتبيله 
وهي لكل فرخه واحده
بصله صغيره - 4 او 5 فصوص ثوم - معلقة صغيره جنزبيل - كوباية زبادي او لبن رايب - شوية ميه صغيرين
معلقة كبيره ملح - رشة زعتر او حصالبان - رشة بابريكا - لو تحبوه حامي نقطتين هوت صوص او رشة شطه
والجديد هو معلقة سكر وممكن تضيفوا عسل هيكون احلى

نصفي التتبيله كويس بالمصفاه وبعدين ننقع الفراخ في الميه اللي نزلت من التصفيه

نسيبها مش اقل من 4 ساعات ويفضل انها تكون قبلها بالليل او ممكن نتبلها ونشيلها في الفريزر بتبقى حلوه قوي

وبعدين نجيب بيض ونضربه مع نقطة خل

ودقيق وهو اللي هيعمل الطعم والقرمشه
لكل كوباية دقيق نخلط عليها نص معلقة صغيره ثوم بودره ونص معلقة صغيره بصل بودره 
وربع معلقة زعتر وربع معلقة بابريكا ورشة جنزبيل وربع معلقة سكر بني او عادي ورشة ملح

نغطي قطع الفراخ بالبيض وبعدين بالدقيق المخلوط عليه التوابل ونخلي حركة ايدينا سريعه علشان يكون التغطيه مش منتظمه
ونكرر الخطوات نغطي بالبيض ثم الدقيق وهكذا مره او اتنين

نجيب حلة الضغط ونحط فيها زيت ولو فيه نحط قطعة زبده نباتي معاه للطعم ولما الزيت يقدح نحط قطع الفراخ

ونقفل الحله ونحط الصفاره .. نخليها على تالت اكبر عين ونهدي لتحت

احسبوا عشر دقايق بالتمام بعد ما الحله تصفر وبعدين طفوا النار وشيلو الصفاره وخلوها تطلع البخار لوحدها مش هتاخد ثواني

تحذير: بلاش نفتح الحله بالميه .. ونسيبها تخرج البخار لوحدها بعد ما نشيل الصفاره

هنا بعد ما فتحت الحله

هتفتحوا ان شاء الله تلاقوها اتحمرت وكمان ضامنين انها استوت من جوه 
ولو لسه محتاجه لون زياده شيلو الغطا وزودوا النار وهي هتتحمر في ثواني وتبقى مقرمشه

وده شكلها من جوه .. استوت

اتفضلوا بالف هنا وشفا

وصوره كمان للتعذيب

بجد جربوها هتعجبكم قوي ولو خايفين من حلة الضغط في الموضوع الاول بتاع الكنتاكي 
شرحت كذا طريقه للقلي علشان الفراخ تطلع مستويه ومقرمشه
احنا مدمنين البيك لما بنروح السعوديه 
وبجد ماما وبابا عجبتهم قوي وقالوا انها نفس الطعم .. يارب تعجبكم انتوا كمان
ولا تنسوني من صالح الدعوات .. جمعه مباركه علينا جميعا

لا تحرموني من تقييمكم للموضوع ..

ثوميه
ودي اكثر طريقه جربتها وقريبه من اللي بتتقدم في المطاعم

فصين ثوم كباار
4 معالق طعام زيت ذره
3 نقاط عصير ليمون (عصرة ليمون)
نص معلقه ملح
3 معالق طعام نشا (كورن فلاور)
ثلاث ارباع كوب ماء

يذاب النشا في الماء ويوضع على نار خفيفه ويغلي 3 دقايق فقط



لحدل لما يتماسك شويه زي المهلبيه وهيصبح لونه شفاف



ارفعيه من على النار واتركيه يبرد



يدق الثوم مع الملح





وبعدين نضع الثوم المهروس في كوباية الخلاط مع عصير الليمون والنشا المطبوخ



ونخفقه واثناء الخفق نضيف الزيت على هيئة سرسوب
لحد لما تحصلي على الثوميه ولونها بيتحول لابيض ناصع وقوامها كريمي





اهم تكه ان النشا يبرد تماما قبل ضربه بباقي المكونات
لان لو حاتحط سخن الثوم بيطبخ وطعمه بيتغير ولونه كمان

نسيبه في الثلاجه شوية قبل التقديم علشان الطعم يظهر

المقادير دي بتعمل برطمان صغير ..

8 كوب كرنب متقطع رفيع
نصف كوب جزر واخلطيهم مع بعض



التتبيله: كوب وثلث مايونيز يعني برطمان تقريبا + معلقتين طعام حليب + معلقتين طعام سكر + 3 معالق خل + ربع معلقة ملح
وقلبيهم كويس



ضيفيهم على الكرنب والجزر وقلبي واحتفظي بيه في علبه مغلقه كويس في الثلاجه



لا تقدم الا بعد مرور 24 ساعه ل 48 ساعه في الثلاجه
علشان الجزر والكرنب ينزلوا ميتهم ويعطوا طعم افضل

تفاصيل أخرى

تجهيز الفرخه وتتبيلها

الاول بتقطعي الفرخه ل8 قطع وبتتبليها في

كوباية لبن رايب وملعقة ثوم مفروم ومية بصله ومعلقة صغيره جنزبيل ناعم
ومعلقه كبيره ملح ومعلقه من خلطة التوابل السريه (هاكتبها ان شاء الله)
وممكن نقطتين هوت صوص لو بتحبيه حراق

المهم الفرخه تتقطع ل 8 قطع وتكون صغيره او تشققيها بالسكينه
وتتبل قبلها بيوم وتحفظ في علبة بلاستيك متغطيه

خلطة التوابل 

جبتها من النت و مجرباها وبجد نفس الطعم واحسن

هتجيبي مكوناتها من العطار والسوبر ماركت وكتبت لكم البدايل

ملعقة طعام روز ماري(حصالبان = اكليل الجبل)
ملعقة طعام اوريجانو
ملعقة صغيرة زنجبيل بودرة
ملعقة صغيرة بردقوش
ونصف معلقه زعتر
3 ملاعق طعام سكر بني (باستخدم العادي)
3 ملاعق طعام بقدونس جاف و مهروس (من العطار)
ملعقة صغيرة فلفل
ملعقة طعام بابريكا (فلفل احمر حلو بودرة)
2 ملعقة طعام ثوم مخلوط بالملح(باستخدم الثوم البودره بتاع ايزيس)
2 ملعقة طعام بصل مخلوط بالملح(باستخدم البصل المجفف من العطار)
ملعقة طعام مكعب ماجي مفتت او 2 مكعب ماجي او كيسين مرقه فوريه 
كيس شوربة طماطم من ماجي (مش باستخدمها)

بافرمهم مع بعض في كبة التوابل لحد لما ينعموا وانخلهم بمنخل واحفظهم في برطمان في الثلاجه

-----------------------
الطريقه

تخلطي معلقتين من البهارات دي على كوباية الدقيق وممكن تخلطي معاه دقيق دره

تغطي قطع الفراخ بالبيض ثم الدقيق فقط من غير بقسماط وتكرري بيض ودقيق اكثر من مره
وتدخليهم الثلاجه علشان تتماسك القشره الخارجيه
--------------------------
سخني زيت دره كتيير .. باضيف له قطعة زبده نباتي فيرن
ولما يسخن سقطي فيه قطع الفراخ بس ما تكونش كتير ويكون الزيت غزير ومغطيها
ولما القشره تتماسك هدي النار لتحت (متوسطه) وغطي الطاسه بغطا مناسب علشان البخار يسوي الفراخ
وكل شويه قلبي الفراخ في الزيت

وسيبيها مش اقل من ثلث ساعه علشان تستوي من جوه

--------------------------

طريقه تانيه 

انك تقليها ولما تتحمر شويه وتتماسك .. طلعيها ورصيها متباعده في صينيه تيفال
ودخليها فرن مسخن من قبلها على حراره متوسطه
ولما تستوي بعد نص ساعه كده
شغلي الشوايه وخليها تتحمر وقلبيها علشان تبقى مقرمشه من جميع الجهات

--------------------------

اما لصاحبات القلوب الجامده زي حالاتي ... ههههههههه

الطريقه الثالثه

جربت اقلي في حلة الضغط بعد ما اخدت الطريقه من على النت برضه
وعلى فكره حلة الضغط عندي مش ماركه ولا حاجه وقديمه مش جديده ومن غير تايمر والومنيوم

الاول بتحطي الزيت في الحله ومعاها قطعة الزبده النباتي ولما الزيت يسخن ويبقى جاهز

سقطي فيه قطع الفراخ

اقفلي غطا الحله وطبعا يكون فيه الصفاره

الصراحه انا خفت اعلى النار وخليت الحله على ثالث اكبر عين وهديت النار لتحت

احسبي من بعد ما الصفاره تصفر عشر دقايق بالظبط
وبعدين ابعديها عن النار او طفي النار

وشيلي الصفاره وخليها تفضي البخار مش هياخد ثواني

تحذير : اوعي تفتحي عليها ميه علشان تبرديها .. لان فيها زيت .. شيلي الصفاره وهي هتطلع البخار

لما تبطل الصوت افتحي الغطا .. كده انتي ضامنه ان الفراخ مستويه من جوه
ولو لسه مش متحمره من بره .. ارفعي حرارة النار وسيبيها تتحمر وتقرمش براحتها بدون ما تحطي غطا الحله تاني عليها

شيليها ونشفيها من الزيت

ميزة حلة الضغط انك ممكن تقلي كمية كبيره في وقت سريع .. وضامنه ان الفراخ مستويه من جوه
صدقوني جربتها وانا مرعوبه لدرجة اني جريت بره المطبخ اول ما قفلت الحله والحمدلله ماحصلش حاجه
بس برضه لازم الحذر اثناء استخدامها ويكون الاطفال بعيد
--------------------
جربوها ومنتظره رايكن فيها

بقلم محمد الكويفي

اعلامي ومدون من غزة -فلسطين- ماجستير ادارة إعلام، بكالوريوس صحافة واعلام، دبلوم تكنلوجيا معلومات، دبلوم لغة انجليزية في الصحافة والسياسة، مدرب اعلام وانتاج ....

Posted in: الأكلات اللذيذة